Ibaialde ikastolaren 25 urteurrena - Kontzertuak

Nafarroa hegoaldeko ikastolak egoera larrian daudela iragarri zuen atzo Ikastolen Elkarteak, Lodosa-Sartagudako Ibaialderen egoera azpimarratuz. Hori dela-eta, datorren otsailaren 5ean, igandea, Elkartasun Festa deitu du ikastolak berak Sartagudan, zentroak dituen behar ekonomikoei aurre egiteko.

12.00etatik aurrera kontzertuak izango dira frontoian, Laket, Neu'e Buruben, Norte Apache, Ze Esatek!, Bizardunak eta Los Zopilotes Txirriaos taldeekin. Ordu berean, baina eskola gunean, Sakanako herri kirolak eta Lezaungo trontzalariak ikusteko aukera izango da, besteak beste.

Bazkalostean, berriz, Aitzol Barandiaran, Aitor Sarriegi, Andoni Egaña eta Maialen Lujanbio bertsolariak arituko dira.

Euskal gizarteak euskararen aldeko ekimenei erakutsi izan dien elkartasuna goraipatuz, Koldo Tellitu Ikastolen Elkarteko presidenteak oraingoan ere bultzada ematera dei egin zuen. Horren harira, 2003an, euritea izan zela-eta, Irunberriko Nafarroa Oinez bertan behera gelditu zenean jasotako elkartasuna ekarri zuen gogora. Halaber, bere ekarpena egin nahi duen orok, Euskadiko Kutxako kontu korrontean (3035 0153 46 1531026051) egin ahal izango duela adierazi zuen.

(Gara)

Beraz, badakizue  Laket, Neu'e Buruben, Norte Apache, Ze Esatek!, Bizardunak eta Los Zopilotes Txirriaos ikusteko eta Ibaialde ikastola laguntzeko Otsailaren 5ean denok Sartagudara!